రాజన్న సిరిసిల్ల జిల్లా వేములవాడ శ్రీ రాజరాజేశ్వర స్వామి ఆలయానికి చెందిన తిప్పాపూర్ గోశాలలో కోడెలు వరుసగా మృతి చెందడం తీవ్ర ఆందోళన కలిగిస్తోంది. కేవలం రెండు రోజుల్లో 14 కోడెలు మృతిచెందినట్టు సమాచారం ఉంది. గోశాల సిబ్బంది మృత కోడెలను ట్రాక్టర్లలో తీసుకెళ్లి మూలవాగులో పూడ్చినట్టు ప్రచారం జరుగుతోంది. ఆలయానికి భక్తులు మొక్కుల రూపంలో సమర్పించే కోడెలను గోశాలలోనే సంరక్షిస్తారు. కోడెల మొక్కుల ద్వారా కోట్ల రూపాయల ఆదాయం లభిస్తున్నా, గోశాల నిర్వహణలో నిర్లక్ష్యం కనిపిస్తోందన్న విమర్శలు వెల్లువెత్తుతున్నాయి. ఈ ఘటనపై కేంద్ర మంత్రి బండి సంజయ్ తీవ్ర ఆవేదన వ్యక్తం చేస్తూ గోశాలను విస్తరించాలని ఆలయ ఈవోను సూచించారు. రాజన్న ఆలయం నిధులు ఇతర అవసరాలకు వాడినట్టు ఆరోపించారు.

ఇకపోతే, జిల్లా కలెక్టర్ సందీప్ కుమార్ ఝా తిప్పాపూర్ గోశాలను ఆకస్మికంగా తనిఖీ చేశారు. మేత నాణ్యత, పరిసరాల పరిశుభ్రత, కోడెల ఆరోగ్య పరిస్థితులపై వివరాలు సేకరించారు. ఆయన ప్రకారం ఇటీవల అకాల వర్షాలు, అనారోగ్య కారణాలతో 8 కోడెలు మాత్రమే మృతి చెందినట్లు స్పష్టం చేశారు. ఇతర మృతుల వార్తలు అపప్రచారమని, బాధ్యతగా సంరక్షణ కొనసాగుతున్నట్టు తెలిపారు. పశువైద్య సిబ్బంది నిరంతరం సేవలు అందిస్తున్నారని చెప్పారు. అలాగే, గోశాలలో నిత్యం పచ్చి గడ్డి, పరిశుభ్రత, మరియు మిగిలిన సదుపాయాల విషయంలో అధిక జాగ్రత్తలు తీసుకోవాలని అధికారులను ఆదేశించారు.